Жарскі Іван Міхайлавіч працаваў рэктарам установы вышэйшай адукацыі "Беларускі дзяржаўны тэхналагічны ўніверсітэт" (БДТУ) з 1986 па 2016 гг. Нарадзіўся 7 ліпеня 1944 г. у вёсцы Вярбіцы Навагрудскага р-на Гродзенскай вобласці. Выпускнік Беларускага тэхналагічнага інстытута імя С. М. Кірава (з 1993 г. – БДТУ). Працуе ў БДТУ з 1971 г.: аспірант, асістэнт, дацэнт кафедры агульнай і неарганічнай хіміі (1971–1981), загадчык кафедры хіміі, тэхналогіі электрахімічных вытворчасцей і матэрыялаў электроннай тэхнікі (1981–2012), прарэктар па вучэбнай рабоце (1981–1981) , рэктар універсітэта (1986–2016). Кандыдат хімічных навук, прафесар, заслужаны работнік народнай адукацыі Рэспублікі Беларусь, ганаровы хімік Рэспублікі Беларусь, акадэмік Міжнароднай акадэміі тэхнічнай адукацыі, акадэмік Міжнароднай акадэміі арганізацыйных і кіраўніцкіх навук, віцэ-прэзідэнт (акадэмік) Міжнароднай экалагічнай акадэміі, член-карэспандэнт Міжнароднай акадэміі вышэйшай школы, ганаровы доктар Санкт-Пецярбургскага лесатэхнічнага ўніверсітэта, сустаршыня Каардынацыйнай навукова-метадычнай рады вучэбна-метадычнага аб'яднання Рэспублікі Беларусь, старшыня двух рэспубліканскіх вучэбна-метадычных аб'яднанняў – па хіміка-тэхналагічнай адукацыі і адукацыі ў галіне прыродакарыстання і лясной гаспадаркі, навуковы кіраўнік падпраграмы «Гальванічныя абсталяванне» ДПНД «Механіка, тэхнічная дыягностыка, металургія».

Вынікі навукова-даследчых распрацовак прафесара І. М. Жарскага ў галіне хімічнай навукі, энергазберагальных тэхналогій, тэхналогіі электрахімічных вытворчасцей і матэрыялаў электроннай тэхнікі ўкаранёны ў прамысловасць, апублікаваны больш як у 450 навуковых работах (у тым ліку ў дзвюх манаграфіях), пацверджаны 70 патэнтамі і аўтарскімі сведчаннямі на вынаходкі. Пад яго кіраўніцтвам абаронена 15 кандыдацкіх дысертацый. Аўтар больш за 30 навучальных дапаможнікаў з грыфам Міністэрства адукацыі і ВМА па хіміка-тэхналагічнай адукацыі, адзін з аўтараў першага ў краіне падручніка па хіміі для вышэйшай школы на беларускай мове "Асновы агульнай хіміі". Вядучы распрацоўшчык дзяржаўных адукацыйных стандартаў (першых і новага пакалення) Рэспублікі Беларусь "Вышэйшая адукацыя" па ўсіх спецыяльнасцях устаноў вышэйшай адукацыі Рэспублікі Беларусь.

Універсітэт з'яўляецца буйным шматпрофільным навучальна-навуковым цэнтрам Рэспублікі Беларусь. БДТУ рыхтуе для вытворчай і сацыяльнай сфер народнай гаспадаркі інжынераў па 31 спецыяльнасці і 62 спецыялізацыях. Па асабістай ініцыятыве і пры непасрэдным удзеле І. М. Жарскага ў 2013–2014 гг. былі адкрыты 8 новых прыярытэтных для рэспублікі спецыяльнасцей і спецыялізацый і створаны новы, адзінаццаты факультэт - факультэт інфармацыйных тэхналогій. У 2013 г. да ўніверсітэта далучаны 5 профільных каледжаў у якасці адасобленых падраздзяленняў. У склад універсітэта ўваходзяць 33 навуковыя галіновыя, навукова-даследчыя лабараторыі і цэнтры, з якіх 14 створаны за апошнія два гады. На вядучых профільных прадпрыемствах краіны дзейнічае 21 філіял кафедраў БДТУ, 17 філіялаў створаны ў 2013–2014 гг.

За апошнія 10 гадоў колькасць навучэнцаў універсітэта павялічылася больш як у 3 разы і складае 15 800 чалавек. Колькасць штатных выкладчыкаў БДТУ, якія маюць вучоныя ступені доктара і кандыдата навук, складае 74,7%. Ва ўніверсітэце дзейнічаюць 18 навукова-педагагічных школ, створаны і функцыянуюць 5 саветаў па абароне доктарскіх і кандыдацкіх дысертацый па 12 навуковых спецыяльнасцях.

Аб'ём фінансавання навукова-даследчых распрацовак за апошнія 5 гадоў павялічыўся ў БДТУ больш як у 4 разы. За апошнія 3 гады атрымана 230 патэнтаў, апублікавана каля 7000 навуковых прац. Штогод навукоўцамі ўніверсітэта выконваецца больш за 400 НДР. У рамках гаспадарчых дагавораў, накіраваных на вырашэнне важных прыкладных праблем, універсітэт супрацоўнічае з больш як 100 прадпрыемствамі і арганізацыямі краіны. У 2010 г. за дасягненні ў падрыхтоўцы прафесійна кампетэнтных кадраў і вынікі навуковых даследаванняў універсітэт узнагароджаны Ганаровым дзяржаўным сцягам Рэспублікі Беларусь.

Вялікая ўвага надаецца матэрыяльна-тэхнічнаму забеспячэнню дзейнасці ўніверсітэта. Лабараторыі БДТУ аснашчаны ўнікальным абсталяваннем, высокі ўзровень маюць камп'ютарная і электронная базы ўніверсітэта, што дае магчымасць праводзіць навуковыя даследаванні ў адпаведнасці з сусветнымі стандартамі. Створаны сучасны цэнтр выдавецка-паліграфічных і інфармацыйных тэхналогій. Поўнасцю рэканструяваны вучэбная, навукова-тэхнічная і вытворчая базы Негарэльскага вучэбна-доследнага лясгаса. Паспяхова развіваецца і ўмацоўваецца сучасная інфраструктура сацкультбыту ўніверсітэта. У апошнія гады за кошт пазабюджэтных сродкаў пабудаваны інтэрнат у лясгасе, стадыён універсітэта з футбольным полем, бегавымі дарожкамі і пляцоўкамі для гульняў з сучасным штучным пакрыццём і шматфункцыянальны спарткомплекс.

У 2005 г. Міністэрствам адукацыі Рэспублікі Беларусь універсітэту прысвоены статус вядучай у краіне вышэйшай навучальнай установы ў лясной, хімічнай і паліграфічнай галінах, а ў 2007 г. рашэннем Савета кіраўнікоў урадаў Садружнасці Незалежных Дзяржаў - статус базавай арганізацыі СНД па адукацыі ў галіне лясной гаспадаркі і лясной прамысловасці.

У 2009 г. пад кіраўніцтвам І. М. Жарскага БДТУ першым сярод беларускіх універсітэтаў укараніў сістэму менеджменту якасці ў адукацыі. Атрыманы нацыянальны і міжнародны сертыфікаты адпаведнасці стандартам сістэмы менеджменту якасці. За дасягненні ў галіне якасці ў 2010 г. універсітэт атрымаў Прэмію Урада Рэспублікі Беларусь.

І. М. Жарскі з'яўляецца намеснікам галоўнага рэдактара навуковага часопіса "Працы БДТУ", членам рэдкалегій часопісаў "Гальванатэхніка і апрацоўка паверхні", "Прыродныя рэсурсы", "Моksloir tecnicos raida. Evolution of Science and Technology” (ТУ, Вільня), членам навукова-праграмнай рады часопіса “Euro Ekspert” (Беластоцкі ТУ, Польшча).

Неаднаразова прадстаўляўся да ўзнагарод найбуйнейшых айчынных і замежных навучальных, навуковых і дзелавых цэнтраў у знак прызнання выдатнага асабістага ўкладу ў інтэлектуальнае развіццё грамадства і сацыяльна накіраваную пазіцыю, высокай якасці і канкурэнтаздольнасці прапанаваных універсітэтам адукацыйных паслуг і навуковых распрацовак. Прадстаўлены ў міжнародных даведніках "Хто ёсць хто" (Амерыканскі біяграфічны універсітэт), "2000 выбітных акадэмікаў 21 стагоддзя" (Кембрыдж, Вялікабрытанія). Мае міжнародныя ўзнагароды: "Узнагарода імя Сакрата", "Еўрапейская якасць", "Аб'яднаная Еўропа" (Оксфард, Вялікабрытанія), "Залаты Ягуар" (Міжнародная праграма "Лідары XXI стагоддзя"), ганаровыя тытулы "Чалавек года" (ЗША), " Імя ў навуцы» (Еўрапейская асамблея бізнесу), ганаровы прафесар Міжнароднага ўніверсітэта г. Вены (Оксфард, Вялікабрытанія) і інш.

За высокія дасягненні ў развіцці вышэйшай адукацыі, навукі і тэхнікі мае ўрадавыя ўзнагароды, сярод іх медаль "Дваццаць гадоў Перамогі ў Вялікай Айчыннай вайне 1941-1945 гг.", юбілейны медаль "65 гадоў вызвалення Рэспублікі Беларусь ад нямецка-фашысцкіх захопнікаў", Грамата Савета Беларускай ССР, Ганаровая грамата Нацыянальнага Сходу Рэспублікі Беларусь, Ганаровая грамата Савета Міністраў Рэспублікі Беларусь, ордэн Пашаны, ордэн Айчыны ІІІ ступені і інш.