19 мая Беларускі дзяржаўны тэхналагічны ўніверсітэт (БДТУ) пяты раз расчыніў свае дзверы для V Міжнароднага маладзёжнага экалагічнага адукацыйнага форуму. Мерапрыемства сабрала маладых спецыялістаў, студэнтаў і экспертаў, зацікаўленых у вырашэнні актуальных экалагічных праблем.

Урачыстая цырымонія адкрыцця прайшла ў святочнай атмасферы. З прывітальным словам да ўдзельнікаў і гасцей звярнуўся рэктар БДТУ - Сяргей Каспяровіч, які падкрэсліў важнасць такіх мерапрыемстваў для фарміравання новага пакалення экалагічна адказных лідараў.

Прадстаўнікі ўніверсітэтаў-удзельнікаў расказалі пра свае навучальныя ўстановы і паказалі кароткія прэзентацыйныя ролікі. У гэтых відэа былі адлюстраваны асаблівасці і дасягненні кожнай ВНУ.

Урачыстая частка адкрыцця завяршылася яркім канцэртам. Творчыя калектывы БДТУ падрыхтавалі для гасцей і ўдзельнікаў форуму насычаную культурную праграму, стварыўшы атмасферу сяброўства і супрацоўніцтва.

Праграма форуму абяцае быць насычанай і рознабаковай. Удзельнікаў чакае праца на пленарных пасяджэннях, дзе вядучыя эксперты абмяркуюць глабальныя праблемы, а таксама круглыя сталы і практычныя заняткі, накіраваныя на выпрацоўку канкрэтных навыкаў і рашэнняў.

Асаблівае месца ў праграме адведзена культурна-пазнавальнай частцы. Дэлегаты форуму наведаюць знакамітыя для Беларусі месцы: мемарыяльны комплекс "Хатынь" і Бярэзінскі біясферны запаведнік. Запланавана таксама экскурсія ў Беларускі дзяржаўны музей гісторыі Вялікай Айчыннай вайны, што дасць магчымасць удзельнікам больш глыбока пазнаёміцца з гісторыяй і прыродай краіны.