5 лістапада 2025 года ў горадзе Далянь, Кітайская Народная Рэспубліка,адбылася ўрачыстая цырымонія адкрыцця Сумеснага інстытута Далянскага тэхналагічнага ўніверсітэта і Беларускага дзяржаўнага тэхналагічнага ўніверсітэта.
Гэтая знакавая падзея стала практычнай рэалізацыяй курсу на ўсебаковае стратэгічнае партнёрства паміж дзвюма краінамі, дэманструючы дынамічнае пашырэнне супрацоўніцтва ў сферы адукацыі і культуры.

Адкрыццё Сумеснага інстытута з'яўляецца прамым следствам дамоўленасцей на высокім узроўні аб развіцці практычнага супрацоўніцтва паміж універсітэтамі і сумесным стварэнні адукацыйных структур.
У цырымоніі адкрыцця прыняў удзел рэктар Беларускага дзяржаўнага тэхналагічнага ўніверсітэта Ігар Войтаў і начальнік аддзела каардынацыі сумесных адукацыйных праграм і вучэбнай працы з замежнымі грамадзянамі Алена Януковіч. З боку Даляньскага тэхналагічнага ўніверсітэта ўдзел прынялі рэктар Лі Чанву, прарэктар Ань Цінда, дырэктар Сумеснага інстытута Чэнь Юй, выкладчыкі і студэнты сумеснага інстытута.

Супрацоўніцтва паміж універсітэтамі, якое пачалося ў 2015 годзе з акадэмічных абменаў і летніх школ, выйшла на якасна новы ўзровень:
2022 год: падпісанне Пагаднення аб стварэнні Сумеснага інстытута;
май 2025 года: атрыманне афіцыйнага сертыфіката Міністэрства адукацыі КНР;
верасень 2025: паспяховы першы набор 300 студэнтаў іх 2400 жадаючых.
Сумесны інстытут прапануе падрыхтоўку па перспектыўных напрамках, крытычна важных для эканомік абедзвюх краін: тэхналагічныя машыны і абсталяванне, інфармацыйныя сістэмы і тэхналогіі і аўтаматызацыя тэхналагічных працэсаў і вытворчасцей.
«Стварэнне гэтага інстытута - гэта не проста адукацыйны праект. Гэта мост дружбы і супрацоўніцтва, які рыхтуе высокакваліфікаваных спецыялістаў, запатрабаваных на міжнародным рынку працы, і ўносіць канкрэтны ўклад ва ўмацаванне стратэгічнага партнёрства нашых краін», - адзначылі прадстаўнікі ВНУ.
Выпускнікі інстытута атрымаюць унікальныя канкурэнтныя перавагі:
два дзяржаўныя дыпломы бакалаўра міжнароднага ўзору;
навучанне па інтэграваных праграмах з доступам да рэсурсаў двух універсітэтаў;
фарміраванне кампетэнцый, якія адпавядаюць выклікам глабальнай эканомікі.

Напрыканцы ўрачыстай цырымоніі прагучалі цёплыя словы рэктара БДТУ Ігара Войтава на адрас усіх удзельнікаў праекта: «Я віншую Вас, паважаныя калегі і студэнты, з пачаткам навучальнага года і жадаю ўсім удзельнікам і арганізатарам сённяшняй падзеі плённай працы, невычэрпнай энергіі, новых ідэй і дасягненняў!»
Гэты новы адукацыйны і навуковы мост, разлічаны на доўгатэрміновую перспектыву да 2041 года, закладвае трывалы фундамент для падрыхтоўкі высокакваліфікаваных кадраў і ўмацавання дружбы паміж дзвюма краінамі.