Члены Савета маладых вучоных, асістэнт кафедры біятэхналогіі Аляксандра Масяхновіч і аспірант Ганна Клімовіч, сумесна з калегамі з Палескага дзяржаўнага ўніверсітэта прынялі ўдзел у Міжнародным семінары, прысвечаным вывучэнню біяразнастайнасці. Мерапрыемства праходзіла з 17 па 25 жніўня 2025 года на базе Варзобскай горна-батанічнай станцыі ў г. Душанбэ, Таджыкістан.
На ўрачыстым адкрыцці семінара з прывітальным словам выступіў прэзідэнт Нацыянальнай акадэміі навук Таджыкістана Хушвахтзода Кабілджон Хушвахт. Да ўдзельнікаў таксама звярнуліся віцэ-прэзідэнт НАНТ Мірзарахімзод Акабір Карым і прадстаўнік Міждзяржаўнага фонду гуманітарнага супрацоўніцтва дзяржаў - удзельніц СНД Камол Рахімаў. Прадстаўнікі дэлегацый з Азербайджана, Беларусі, Казахстана, Кыргызстана, Расіі, Таджыкістана і Узбекістана прывіталі прысутных і пажадалі паспяховай і плённай работы.
У рамках семінара прадстаўнікі розных краін прапанавалі даклады, прысвечаныя актуальным праблемам біяразнастайнасці. Удзельнікі актыўна абменьваліся меркаваннямі, уступалі ў дыскусіі і прапаноўвалі канкрэтныя рашэнні для захавання біялагічнай разнастайнасці. Аляксандра Масяхновіч выступіла з дакладам на тэму "Ацэнка магчымасці выкарыстання залішняга актыўнага глею ў якасці біяўгнаення для сельскагаспадарчых культур", а Ганна Клімовіч прадставіла вынікі даследавання "Вывучэнне фармацэўтычнага патэнцыялу пупаўкі высакароднай (Chamaemelum nobile L.)".
Праграма семінара ўключала насычаную экскурсійную частку. Удзельнікі наведалі Варзобскую горна-батанічную станцыю (ВДБС «Кондара»), маляўнічую цясніну Каратаг (Тэмурдара), Нацыянальны музей старажытнасцяў Таджыкістана, Інстытут батанікі, фізіялогіі і генетыкі раслін Нацыянальнай акадэміі навук Таджыкістана і Цэнтральны батанічны сад. Гэтыя наведванні дазволілі ўдзельнікам не толькі пазнаёміцца з унікальнай прыродай і багатай гісторыяй Таджыкістана, але і пашырыць свой навуковы кругагляд, убачыць прыклады захавання біяразнастайнасці і азнаёміцца з работай навуковых устаноў краіны.
У завяршэнне семінара былі падведзены вынікі і ўручаны сертыфікаты ўсім удзельнікам. Паездка ў Таджыкістан стала каштоўным вопытам для маладых вучоных БДТУ, даўшы магчымасць абмяняцца ведамі з калегамі з розных краін, прадставіць вынікі ўласных навуковых работ і намеціць перспектыўныя напрамкі для будучых даследаванняў.
