З 18 па 20 мая 2025 года дэлегацыя маладых вучоных Беларускага дзяржаўнага тэхналагічнага ўніверсітэта прыняла ўдзел у IV Рэспубліканскім форуме маладых вучоных устаноў вышэйшай адукацыі з міжнародным удзелам, які праходзіў на базе Гомельскага дзяржаўнага ўніверсітэта імя Францыска Скарыны.

Праграма форуму была насычанай і ўключала ў сябе не толькі навуковыя мерапрыемствы, але і культурную праграму, якая дазволіла ўдзельнікам бліжэй пазнаёміцца з гісторыяй і культурай Гомельшчыны. Першы дзень форуму, 18 мая, быў прысвечаны знаёмству з Гомелем. Маладыя навукоўцы БДТУ наведалі палацава–паркавы ансамбль Румянцавых і Паскевічаў – жамчужыну архітэктурнай спадчыны горада. Гэты ўнікальны комплекс, які спалучае ў сабе элементы розных архітэктурных стыляў, з'яўляецца сімвалам Гомеля і адлюстроўвае яго багатую гісторыю.

Урачыстае адкрыццё форуму, 19 мая, пачалося з цырымоніі ўскладання кветак на Алеі Герояў. Удзельнікі форуму, якія прыбылі з розных куткоў Беларусі і з-за мяжы, аддалі даніну памяці героям Вялікай Айчыннай вайны, якія адстаялі свабоду і незалежнасць нашай Радзімы.

Пасля цырымоніі ўкладання кветак адбылося ўрачыстае адкрыццё форуму і пленарнае пасяджэнне, на якім з прывітальным словам выступілі начальнік Упраўлення навукі і інавацыйнай дзейнасці Міністэрства адукацыі Рэспублікі Беларусь ПЯКУЦЬКА Пётр Мікалаевіч і рэктар УА «Гомельскі дзяржаўны ўніверсітэт імя Францыска Скарыны» Хахомаў Сяргей Анатольевіч.

Увечары адбылося пасяджэнне Савета маладых навукоўцаў пры Міністэрстве адукацыі Рэспублікі Беларусь, дзе старшыня СМУ БДТУ Аляксандра Падсасонная выступіла з дакладам аб арганізацыі пляцоўкі «Універсітэт будучыні» ў рамках «Фестывалю навукі – 2025».

Паралельна з пасяджэннем іншыя ўдзельнікі форуму наведалі навуковыя пляцоўкі, прысвечаныя сучасным напрамкам, праблемам і перспектывам развіцця тэхналогій штучнага інтэлекту, выкарыстанню нейрасетак у медыяпрасторы, а таксама новым матэрыялам і тэхналогіям для мікра- і нанаэлектронікі.

20 мая маладыя навукоўцы БДТУ прынялі ўдзел у Міжнароднай навукова-практычнай канферэнцыі, прадставіўшы вынікі сваіх даследаванняў.

У рамках рабочай паездкі на IV рэспубліканскі форум старшыня Савета маладых вучоных БДТУ Падсасонная Аляксандра правяла прафарыентацыйную работу ў сярэдняй школе № 27 г.Гомеля, пазнаёміўшы навучэнцаў з перспектыўнымі напрамкамі падрыхтоўкі ў БДТУ і магчымасцямі для рэалізацыі навуковага патэнцыялу маладых спецыялістаў.

Удзел маладых вучоных БДТУ ў IV Рэспубліканскім форуме стаў важным крокам у развіцці іх навуковага патэнцыялу, умацаванні сувязей паміж навукай і вытворчасцю, а таксама ў абмене вопытам з калегамі з іншых універсітэтаў і арганізацый. Форум прадэманстраваў высокі ўзровень падрыхтоўкі маладых даследчыкаў БДТУ і іх імкненне ўнесці свой уклад у развіццё навукі і тэхналогій у Рэспубліцы Беларусь.