24 мая, Мінск /Кар. БЕЛТА/. Пастановай Савета Міністраў ад 23 мая 2024 года нумар 373 навуковы аб'ект "Ксілатэка ўстановы адукацыі "Беларускі дзяржаўны тэхналагічны ўніверсітэт" аб'яўлены нацыянальным здабыткам. Аб гэтым паведамляе БЕЛТА са спасылкай на Нацыянальны прававы інтэрнэт-партал.

Ксілатэка БДТУ з'яўляецца адзіным у Беларусі сістэматызаваным зборам эталонных узораў драўніны мясцовых і экзатычных дрэвавых раслін, якія шырока выкарыстоўваюцца для вырашэння шматпланавых задач у сферах адукацыі, фундаментальных і прыкладных навуковых даследаванняў, дзейнасці дзяржаўных арганізацый і іншых суб'ектаў гаспадарання.

Згодна з палажэннем аб навуковых аб'ектах, якія складаюць нацыянальны здабытак, зацверджаным пастановай Савета Міністраў ад 7 снежня 1998 года нумар 1873, такімі аб'ектамі прызнаюцца ўнікальныя аб'екты натуральнага або штучнага паходжання, асабліва каштоўныя ў навуковых адносінах, якія не паддаюцца аднаўленню ў выпадку іх разбурэння або такія, страта. якіх можа мець сур'ёзныя негатыўныя наступствы для развіцця навукі і грамадства.

Да іх могуць быць аднесены: унікальныя навуковыя калекцыі; фонды навуковай і навукова-тэхнічнай інфармацыі; даследчыя і эксперыментальныя ўстаноўкі і іх комплексы, навукова-выпрабавальныя палігоны; запаведнікі, нацыянальныя паркі, батанічныя сады, дэндрарыі, асобныя прыродныя тэрыторыі і аб'екты; іншыя ўнікальныя аб'екты агульнанацыянальнай значнасці.

Пастанова нумар 373 прынята ў адпаведнасці з указам Прэзідэнта Рэспублікі Беларусь ад 7 верасня 1998 года нумар 436 "Аб навуковых аб'ектах, якія складаюць нацыянальны набытак".

Віншуем калектыў Беларускага дзяржаўнага тэхналагічнага ўніверсітэта з такой знамянальнай падзеяй!