Узнагарода за прафесіяналізм і творчы патэнцыял

У Дзень друку 5 мая дацэнту кафедры рэдакцыйна-выдавецкіх тэхналогій нашага ўніверсітэта КУЛІКОВІЧУ Уладзіміру Іванавічу была ўручана Ганаровая грамата Нацыянальнай дзяржаўнай тэлерадыёкапаніі Рэспублікі Беларусь за высокі прафесіяналізм, навуковы патэнцыял, педагагічнае майстэрства.

Гэтую ўзнагароду Уладзімір Іванавіч атрымаў за плённую працу па ўдасканаленні творчых навыкаў і ўменняў рэдактараў, дыктараў, вядучых і карэспандэнтаў рэспубліканскіх і абласных праграм тэле- і радыёвяшчання Рэспублікі Беларусь, а таксама за ўкараненне ў практыку навучання матэрыялаў, якія дазваляюць павысіць узровень валодання арфаэпічнымі, арфаграфічнымі, лексічнымі і граматычнымі нормамі сучаснай беларускай літаратурнай мовы.

Акрамя гэтага, выкладчык і навукоўца стварыў 40 вучэбных і вучэбна метадычных дапаможнікаў для школы і ВНУ, з’яўляецца вядучым рубрыкі «Беларускае слоўка» ў газеце «Вечерний Минск», выкладае на факультэце выдавецкай справы і паліграфіі, творча супрацоўнічае з многімі ўстановамі адукацыі ўсіх абласцей нашай краіны, трэці год запар з’яўляецца старшынёй Дзяржаўнай экзаменацыйнай камісіі ў Брэсцкім дзяржаўным універсітэце імя А. С. Пушкіна.

Мы віншуем Уладзіміра Іванавіча, зычым добрага здароўя і новых заслужаных узнагарод за сваю самааданую працу на карысць Бацькаўшчыны.