21–22 кастрычніка 2015 г. у Нацыянальнай бібліятэцы Беларусі адбыўся ІІІ Міжнародны кангрэс «Бібліятэка як феномен культуры». Сёлета ён быў прысвечаны чытанню і інфармацыйнай культуры ў сучасным грамадстве. Вынікі перадавых даследчых прац па бібліятэказнаўстве і кнігазнаўстве былі абмеркаваны на 6 секцыях, акрамя таго на працягу двух дзён праводзіліся прэзентацыі дзейнасці інфармацыйных, культурных, паліграфічных і выдавецкіх цэнтраў (у тым ліку замежных), выставы, шматлікія семінары, круглыя сталы і майстар-класы. На пленарным паседжанні кангрэса таксама адбылася цырымонія ўручэння ўзнагарод удзельнікам I Рэспубліканскага конкурса «Библиотека — центр духовно-нравственного просвещения и воспитания». Усяго ў кангрэсе прыняла ўдзел каля 500 чалавек: навукоўцаў, супрацоўнікаў ВНУ і бібліятэк, выдаўцоў і кнігагандлёвых арганізацый, вытворцаў і пастаўшчыкоў інфармацыйных рэсурсаў і праграмнага забеспячэння з Беларусі, Расіі, Украіны, Літвы, Азербайджана, Польшчы, Германіі, Вялікабрытаніі, Францыі і ЗША.
Як адзначылі арганізатары, прадстаўнікі Беларускага дзяржаўнага тэхналагічнага ўніверсітэта — частыя і жаданыя госці мерапрыемстваў, якія ладзіць Нацыянальная бібліятэка Беларусі. Не стаў выключэннем і III Міжнародны кангрэс. 22 кастрычніка на секцыі «Книжное наследие: проблемы выявления, сохранения и исследования» былі прадстаўлены даклады супрацоўнікаў БДТУ: «Бумага vs Цифра: библиофильский подход» (аўтар Радкевіч А. Г., дацэнт кафедры аўтаматызацыі вытворчых працэсаў і электратэхнікі факультэта хімічнай тэхналогіі і тэхнікі, кандыдат тэхнічных навук) і «Знешнія і ўнутраныя элементы кнігі як аб’ект вывучэння і сродак рэкламавання выдання» (Куліковіч У. І., загадчык кафедры рэдакцыйна-выдавецкіх тэхналогій факультэта выдавецкай справы і паліграфіі, кандыдат філалагічных навук, дацэнт; Тарасевіч К. Т., студэнтка 3 курса факультэта выдавецкай справы і паліграфіі, спецыяльнасць «Выдавецкая справа»). Прэзентацыя другога даклада выклікала вялікую зацікаўленасць сярод спецыялістаў, паколькі ў сучасных умовах развіцця кнігавыдання ў Рэспубліцы Беларусь, якія характарызуюцца высокай канкурэнцыяй паміж рознымі тыпамі арганізацый (буйнымі холдынгамі і малымі выдавецтвамі), а таксама зніжэннем чытацкай зацікаўленасці ў айчыннай кнізе, надзвычай актуальна гучаць пытанні паспяховага прасоўвання беларускамоўнай мастацкай кнігі. Вырашэнню гэтай задачы можа спрыяць поўнае раскрыццё рэкламнага патэнцыялу знешніх і ўнутраных элементаў кнігі як самастойных інфармацыйных складнікаў.
Удзельнікі кангрэса
Злева направа: Суша А. А., намеснік дырэктара па навуковай рабоце і выдавецкай дзейнасці Нацыянальнай бібліятэкі Беларусі, кандыдат культуралогіі; Тарасевіч К. Т., Куліковіч У. І.
