Святочная канцэртная праграма, прысвечаная Міжнароднаму дню роднай мовы, адбылася 21 лютага. Штогод мерапрыемства арганізоўваецца дэканатам па рабоце  з замежнымі студэнтамі і кафедрай беларускай філалогіі.
Традыцыйна гледачоў здзіўлялі выступленні замежных студэнтаў: як сапраўдныя артысты, яны прадэманстравалі аўдыторыі свае разнастайныя таленты.

Праграму адкрыў расказ пра гісторыю свята студэнтаў з Бангладэш і Пакістана. Старанні выступоўцаў у вымаўленні слоў на рускай мове былі ацэнены моцнымі апладысментамі.

З вуст беларускіх студэнтаў прагучалі вершы вядомых паэтаў (М. Багдановіча, Я. Янішчыц, М. Танка, Я. Купала і інш.), а таксама вершы ўласнага сачынення. Так, з аўтарскім вершам “Да роднай мовы” выступіла старшы выкладчык кафедры беларускай філалогіі Міксюк Рэгіна Вячаславаўна.

Песню пра веру і любоў на англійская мове выканалі слухачы з Камеруна і Конга.
Дзень роднай мовы мае асобае значэнне для нашых сяброў з Бангладэш. Таму навучэнцы з гэтай краіны праспявалі свой нацыянальны гімн.

Індыйская студэнтка Каур душэўна праспявала народную індыйскую песню.

Яркія і энергічныя студэнткі з Камеруна, Нігерыі і Конга ў песні на рускай мове шукалі адказ на пытанне “И кто его знает, чего он моргает…”

Для слухачоў прагучала песня на турэцкай мове “Свята жыцця” у выкананні  Ібрагіма.

Бангладэшскі студэнт Мазідул Іслам падрыхтаваў выдатны верш на сваёй роднай мове пра радзіму, мову, перамогу.

Індыйскі танец у выкананні замежных слухачоў БДТУ дадаў іскру ў канцэртную праграму.

Вакальны ансамбль выкладчыкаў і супрацоўнікаў універсітэта “Акавіта” парадаваў аўдыторыю вядомымі песнямі “Ясная зара”, “Калінка”, “Купалінка”.

Мерапрыемствы дадзенай накіраванасці прызваны падкрэсліць той факт, што ўсіх нас аб’ядноўвае любоў да сваёй краіны і народа, што існуе разнастайнасць культур і моў, якая заўважная і ў БДТУ, бо ў нашым універсітэце штогод навучаецца больш за 350 замежных студэнтаў з Туркменістана, Ірана, Ірака, Турцыі, Нігерыі, Кітая, Шрі-Ланка, Вьетнама, Фінляндыі, Таджыкістана і іншых краін свету. 

  

Фотаздымкі з мерапрыемства знаходзяцца ў галерэі сайта.

 

Опубликовано: 22.02.2017