Буквары народаў свету

26 красавіка 2018 г. у 16:30 у Музеі кнігі Нацыянальнай бібліятэкі Беларусі адбудзецца адкрыццё міжнароднай выставы «Буквары народаў свету», якая прадстаўляе разнастайнасць і непаўторнасць варыяцый самай першай кнігі для навучання грамаце ў розных народаў свету.

Выстава прымеркавана да знамянальнай даты - 400-годдзя выдання першай у свеце кнігі пад назвай "Буквар", якая, дарэчы, была падрыхтавана нашымі продкамі. Выстава арганізавана пры ўдзеле пасольства Латвійскай Рэспублікі ў Рэспубліцы Беларусь, пасольства Рэспублікі Беларусь ў Латвійскай Рэспубліцы, Праекта мабільнасці Еўрапейскага Саюза "MOST".
На выставе ўпершыню ў Беларусі будзе прадстаўлена каля 1400 буквароў амаль на 600 мовах самых розных народаў пяці частак свету - Еўропы, Азіі, Амерыкі, Афрыкі, Аўстраліі і Акіяніі.
Аснову экспазіцыі складае ўнікальная прыватная калекцыя буквароў і азбук латышскага педагога, аўтара буквароў і кніг пра народы свету і іх мовы, калекцыянера Юрыса Цыбульса, якая налічвае больш за 10 000 выданняў болей чым на 1000 мовах. Гэта найбуйнейшая калекцыя ў свеце.
Асаблівае месца на выставе займаюць беларускія кнігі для навучання грамаце XVI-ХХI стагоддзяў з фондаў Нацыянальнай бібліятэкі Беларусі. Розныя па складзе, графіцы, мастацкім афармленні, педагагічных прыёмах навучання, яны дэманструюць 400-гадовую гісторыю беларускага буквара.
Кожны з экспанатаў з'яўляецца мініяцюрнай энцыклапедыяй, у якой у нагляднай і займальнай форме падаюцца веды пра гісторыю, геаграфію, культуру свайго народа, дасягненні ў розных галінах жыцця.
Выстава будзе працаваць у бібліятэцы да верасня. Запрашаем!

Инфармацыя для сувязі:

Куратар выставы - Алесь Суша (293-25-03);

Музей кнігі (293-27-22).

Опубликовано: 26.04.2018

Больше по рубрике