Апошнія дні зімы і пачатак вясны былі для кафедры рэдакцыйна-выдавецкіх тэхналогій надзвычай клопатнымі і плённымі. Па-першае, мы размеркавалі і ўручылі дыпломы 100 выпускнікам, якія закончылі факультэт прынттэхналогій і медыякамунікацый па спецыяльнасці “Выдавецкая справа”, у тым ліку і факультэт завочнага навучання.
Па-другое, 3 і 4 сакавіка 2017 г. загадчык кафедры Уладзімір Куліковіч, разам з прадстаўнікамі Мінскага абласнога інстытута развіцця адукацыі па запрашэнні адміністрацыі беларускай гімназіі імя Ф. Скарыны г. Вільні наведаў літоўскую сталіцу, дзе прыняў удзел у семінары “Сучасныя падыходы да вывучэння культурнай спадчыны беларускага народа: да 500-годдзя беларускага кнігадрукавання”.
Падчас візіту ў гімназію Уладзімір Іванавіч правёў прэзентацыю сваіх новых кніг, а таксама майстар-клас для настаўнікаў і вучняў па падрыхтоўцы да Рэспубліканскай алімпіяды школьнікаў па беларускай мове і літаратуры, у якой возьмуць удзел і літоўскія школьнікі.
Уладзімір Іванавіч пазнаёміў выпускнікоў гімназіі з практыка-арыентаванымі падыходамі ў навучанні, што прымяняюцца ў Беларускім дзяржаўным тэхналагічным ўніверсітэце, распавёў пра спецыяльнасці і спецыялізацыі нашай установы. У вучняў была добрая магчымасць з першых вуснаў даведацца пра наш універсітэт, каб у далейшым прыняць рашэнне для паступлення менавіта да нас. Справа ў тым, што кожны год беларускай дзяржавай вылучаецца квота літоўскім беларусам для вучобы ва ўстановах вышэйшай адукацыі Рэспублікі Беларусь. Магчыма, хтосьці з іх у наступным годзе і стане студэнтам БДТУ.
Акрамя гэтага загадчык кафедры сустрэўся з кіраўнікамі Згуртавання беларускіх грамадскіх арганізацый Літвы і выдаўцамі беларускай газеты ў Вільні пад назвай “Рунь”, прыняў удзел у мерапрыемстве “Свята хлеба”, якое ладзілі ў Віленскім Доме нацыянальных суполак прадстаўнікі нацыянальных меншасцяў Літвы — беларусы, рускія, украінцы, татары, казахі, кіргізы, малдаване і нават нанайцы.
Вынікам плённага візіту стала ўзгадненне тэксту дамовы аб супрацоўніцтве паміж БДТУ і Віленскай беларускай гімназіяй імя Францішка Скарыны, якая з’яўляецца цэнтрам культурнага жыцця беларусаў у Літве.
Злева направа: прэзідэнт Згуртавання беларускіх грамадскіх арганізацый Літвы, псіхолаг Віленскай гімназіі імя Ф. Скарыны Ларыса Слесарава, Уладзімір Куліковіч, дырэктар гімназіі Дзіяна Стахновіч, прарэктар Мінскага абласнога інстытута развіцця адукацыі Алена Даўгун.
Уладзімір Куліковіч уручае дырэктару гімназіі Дзіяне Стахновіч падарунак ад выдавецтва “Аверсэв”
