Сёлета кафедра беларусістыкі Варшаўскага ўніверсітэта адзначае сапраўды вялікую дату: 60 год з дня заснавання. У гонар гэтай падзеі з 30 лістапада па 1 снежня была зладжана канферэнцыя “Польска-беларускія літаратурныя, моўныя і культурныя сувязі”.
Павіншаваць загадчыка кафедры прафесара Варшаўскага ўніверсітэта Ніну Баршчэўскую і ўвесь калектыў прыехалі прадстаўнікі самых розных айчынных і замежных інстытутаў: Культурнага цэнтра Беларусі ў Варшаве, Дзяржаўнага ўніверсітэта імя Марыі Складоўскай-Кюры, Беларускага дзяржаўнага ўніверсітэта, Нацыянальнай акадэміі навук Беларусі, Мінскага абласнога інстытута развіцця адукацыі і інш. Таму сапраўды гонарам — і вялікай адказнасцю — было для нас, прадстаўнікоў БДТУ, удзельнічаць у мерапрыемстве такога маштабу. На ўрачыстым адкрыцці канферэнцыі мы перадалі прывітанне ад калегаў-рэдактараў і супрацоўнікаў БДТУ, а таксама прэзентавалі кнігу У. І. Куліковіча “Гучанне беларускага слова”.
На працягу двух дзён, нягледзячы на панурае восеньскае надвор’е, у Варшаўскім універсітэце было светла ад усмешак і цёплых слоў. На секцыйных паседжаннях абмяркоўваліся самыя актуальныя тэмы беларуска-польскай культуралогіі, мовазнаўства, літаратуразнаўства і гісторыі. Вось назвы некаторых дакладаў: “Як пра цябе пішуць, так цябе бачаць — польска-беларускія рэфлексіі пра афіцыйны вобраз Беларусі — дзяржавы і грамадства” (Варшава); “Беларуская мова як сімвалічны вызначальнік сучаснай нацыянальнай ідэнтычнасці” (Варшава), “Кракаўская школа драматургіі і яе ўплыў на беларускі літаратурны сімвалізм” (Мінск), “Маленькі чалавек у беларускім руху ў міжваеннай Польшчы: да пастаноўкі праблемы” (Гродна).
На падвядзенні вынікаў арганізатары з задавальненнем адзначылі вялікую колькасць маладых удзельнікаў канферэнцыі, якія па ўзроўню падрыхтоўкі дакладаў не саступалі мэтрам навуковага згуртавання Беларусі і Польшчы. Мерапрыемства запомнілася актыўнымі дыскусіямі, паспрыяла наладжванню новых — і абнаўленню існуючых — кантактаў паміж навуковымі і грамадскімі інстытутамі абедзвюх краін.
Ад імя супрацоўнікаў факультэта прынттэхналогій і медыякамунікацый у цэлым і кафедры рэдакцыйна-выдавецкіх тэхналогій у прыватнасці хочам яшчэ раз шчыра падзякаваць калегам з кафедры беларусістыкі Варшаўскага ўніверсітэта за запрашэнне і цёплы прыём, павіншаваць з юбілеем і пажадаць поспехаў і плёну ў далейшай працы на ніве беларускай нацыянальнай культуры.
Аспірант кафедры
рэдакцыйна-выдавецкіх тэхналогій Яўгенія Лабоха
і студэнтка Ксенія Тарасевіч
Казіміраўскі палац, зала Сенату, перад пленарным паседжаннем
Яўгенія Лабоха (справа) і Ксенія Тарасевіч
Дырэктар Культурнага цэнтра Беларусі ў Варшаве Міхаіл Рыбакоў
Прадстаўнікі філалагічнага факультэта БДУ: намеснік дэкана па навуковай рабоце П. І. Навойчык (злева) і намеснік дэкана па вучэбна-метадычнай рабоце М. М. Хмяльніцкі
Ксенія Тарасевіч і Яўгенія Лабоха прэзентуюць прафесару Ніне Баршчэўскай кнігу У. І. Куліковіча
Ксенія Тарасевіч і Яўгенія Лабоха на ганку Казіміраўскага палаца
