Літаратурны клуб БДТУ “Ветліца”, кафедра беларускай філалогіі, дэканат факультэта ПіМ сардэчна віншуюць студэнтку Значонак Дар’ю Аляксандраўну (ІV-ПіМ, 4 гр.) з перамогай у І Рэспубліканскім конкурсе маладых літаратараў “Першацвет”.
У названым конкурсе прымалі ўдзел каля 160 маладых паэтаў і празаікаў з розных рэгіёнаў Беларусі. У дзвюх намінацыях “Паэзія” і “Проза” лепшымі былі прызнаны 20 аўтараў, сярод якіх і наша Дар’я Значонак .
Урачыстая цырымонія ўзнагароджання пераможцаў конкурсу адбылася 8 лютага на ХХІV Мінскай міжнароднай кніжнай выставе-кірмашы. Прадстаўнікі аргкамітэта конкурсу павіншавалі Дар’ю з перамогай і ўручылі дыплом. З віншавальнымі словамі на цырымоніі ўзнагароджання выступіла кіраўнік літаратурнага клуба “Ветліца” старшы выкладчык кафедры беларускай філалогіі БДТУ Савіцкая Надзея Яўсееўна. А дарадца па культуры Пасольства Ісламскай Рэспублікі Іран у Рэспубліцы Беларусь уручыў Дар’і Значонак памятны падарунак.
Яшчэ раз віншуем Дар’ю з перамогай. Жадаем ёй далейшых поспехаў у літаратурнай творчасці і вучобе, здзяйснення мараў, ажыццяўлення ўсіх планаў!
Матэрыял падрыхтавала Савіцкая Н.Я.
(кафедра беларускай філалогіі)
.jpg)