Да Года культуры і 125-годдзя з дня нараджэння М. Багдановіча была прымеркавана прэзентацыя манаграфіі “Максім Багдановіч: коды жыцця і творчасці” (Мінск: БДТУ, 2015), арганізаваная кафедрай беларускай філалогіі ў межах 80-й навукова-тэхнічнай канферэнцыі БДТУ з міжнародным удзелам.

Аўтар выдання – загадчык кафедры, дацэнт Мікалай Валянцінавіч Трус – шмат гадоў даследуе жыццёвы і творчы шлях класіка беларускай літаратуры. На яго навуковым рахунку налічваецца каля 100 багдановічазнаўчых публікацый, якія пабачылі свет у навуковых выданнях Беларусі і замежных краін, а таксама персанальная літаратурная энцыклапедыя “Максім Багдановіч” (2011), у якой даследчык выступіў як складальнік (разам з І.У. Саламевічам), навуковы рэдактар, аўтар звыш паўсотні артыкулаў.

Манаграфія “Максім Багдановіч: коды жыцця і творчасці” створана ў рэчышчы актуальных фундаментальных даследаванняў і запытаў прыкладной навукі. Творчая спадчына М. Багдановіча разглядаецца ў розных аспектах і на розных узроўнях (сінхронным і дыяхронным). Шырока выкарыстоўваюцца архіўныя матэрыялы, магчымасці кантэкстуальнай падсветкі, што істотна ўзбуйняе маштабнасць бачання ўсёй беларускай літаратуры ў яе цеснай сувязі з іншанацыянальнымі культурнымі традыцыямі.