Цяньцзінскі ўніверсітэт замежных моў (Кітайская Народная Рэспубліка), г. Цяньцзінь) стаў шостым асяродкам беларускасці ў Кітайскай Народнай Рэспубліцы. Тут з 16 па 18 мая 2019 г. пры падтрымцы Пасольства Рэспублікі Беларусь у КНР адбыліся мерапрыемствы, якія паспрыялі, каб універсітэт набыў такі статус. Сярод знакавых мерапрыемстваў: сумесны канцэрт беларускіх і кітайскіх студэнтаў, прысвечаны Году адукацыі Беларусі ў Кітаі, адкрыццё навукова-культурніцкага цэнтра Якуба Коласа, Міжнародная навуковая канферэнцыя «Літаратура ў культурнай прасторы Беларусі і Кітая», прысвечаная народнаму паэту Беларусі Якубу Коласу.
 
Вітальнае слова пасла РБ у КНР К. Рудага Падчас канферэнцыі

Ва ўсіх гэтых мерапрыемствах актыўны ўдзел прыняла і беларуская дэлегацыя, у склад якой ўвайшлі прадстаўнікі Музея Якуба Коласа ў Мінску, Нацыянальнага інстытута адукацыі, лінгвістычнага ўніверсітэта, Выдавецкага дома «Звязда», гімназіі №23 г. Мінска. Ад Беларускага дзяржаўнага тэхналагічнага ўніверсітэта быў запрошаны загадчык кафедры РВТ Уладзімір Куліковіч, які выспупіў на канферэнцыі з дакладам «Тыпалагічныя асаблівасці вучэбных выданняў Якуба Коласа».

Акрамя гэтага Уладзімір Куліковіч правёў перагаворы з Бэй Вэньлі – дырэктарам Цэнтра вывучэння Беларусі пры Усходне-Кітайскім педагагічным ўніверсітэце, Янг Цзюнем – сакратаром парткама Цэнтра рускай мовы пры Сычуаньскім універсітэце замежных моў, Ірынай Пасюкевіч – дырэктарам «Гімназіі з беларускай мовай навучання №23 г. Мінска» аб перспектыўных напрамках супрацоўніцтва з БДТУ.

Важны вынік паездкі ў тым, што кітайскія калегі выказалі цвёрды намер прыняць удзел у Скарынаўскіх чытаннях, якія ладзіць кафедра рэдакцыйна-выдавецкіх тэхналогій восенню 2019 г., і больш дэталёва пазнаёміцца з нашым універсітэтам.