Партрэт беларускай матулі

У Дзень маці, 14 кастрычніка, на занятках па дысцыпліне “Беларуская мова (прафесійная лексіка)” панавала асабліва цёплая атмасфера.

Дацэнт Вераніка Мандзік прапанавала другакурснікам факультэта ЛіД (група № 7) і першакурснікам ІЭФ (група № 1) узгадаць любімыя маміны фразы і парады, а таксама запісаць словы-асацыяцыі, звязаныя з самым дарагім у свеце чалавекам.

У выніку атрымаўся створаны з любоўю калектыўны партрэт беларускай матулі: пяшчотнай, клапатлівай, мудрай, жартаўлівай, той, якая заўсёды пацікавіцца, што ты сёння еў, а ў адказ на надакучлівае пытанне “Маааам! А дзе мой (рукзак, тэлефон, касцюм – патрэбнае падкрэсліць)” не-не ды і скажа: “Дзе кінуў, там і шукай”. На занятках квітнелі ўсмешкі, гучалі словы падзякі ў адрас нашых матуль.