Літаратурны клуб “Ветліца” праводзіць…
Лірычныя вечары ў Тэхналагічным
“Звёздный след”
Прэзентацыя творчасці Дзіяны Клімавай
26 лютага 2025 года ў кабінеце літаратурнага клуба гучалі вершы Дзіяны Клімавай – студэнткі 4 курса факультэта тэхналогіі арганічных рэчываў.
Дзіяна прэзентавала другі зборнік паэзіі пад назвай “Звёздный след”. Чытаючы вершы, Дзіяна расказвала, што натхніла яе на напісанне таго ці іншага верша, успамінаючы эпізоды з жыцця, сустрэчы з цікавымі асобамі. Дзіяна адказвала на пытанні аўдыторыі, і мы змаглі даведацца, што Дзіяна пачала пісаць вершы яшчэ ў школе, зараз яна жыве ў інтэрнаце на Чурлёніса, і там яна з’яўляецца старастай літаратурнага гуртка, дапамагае праводзіць творчыя вечарыны і канцэрты.
У літаратурным клубе “Ветліца” Дзіяна ўжо трэці год. Часта выступае на мерапрыемствах клуба, мае публікацыю ў адзінаццатым альманаху “AVE”, падрыхтавала камп’ютарны зборнік вершаў і буклет, удзельнічала ў рэспубліканскіх літаратурных конкурсах і марафонах. Напярэдадні прэзентацыі, 25 лютага, атрымала дыплом Рэспубліканскага конкурса творчых работ сярод моладзі “Родник духовного наследия”.
Акрамя вершаў, Дзіяна аўтар песень – на свае вершы яна піша музыку, іграе на укулеле, цудоўна чытае вершы , і не толькі свае. Варта адзначыць, што Дзіяна паспявае вельмі добра вучыцца, і любіць вучыцца, і ў захапленні ад тых ведаў, якія атрымлівае на факультэце.
Прысутныя студэнты з цікавасцю слухалі вершы Дзіяны, часта ўзнагароджваючы яе сваімі бурнымі апладысментамі, успрымаючы паэтычныя выказванні не толькі думкамі, але і сэрцам.
